رمضان 11 - مستريح و مستراح منه

 

تخيل أن انسان يموت فتستريح منه الدواب و الشجر!!

شعور مؤلم انك تخرج من الدنيا فالدنيا تستريح منك من سوء أعمالك ..

و شعور رائع انك تخرج من الدنيا فتستريح أنت منها و تستمتع برحمة الله الذي رزقك بصالح الأعمال ..

اللهم اجعلنا من عبادك المؤمنين و اجعل خير أعمالنا خواتمها :)

رمضان 10 - لقاء الله

ساعات ترجع من شغلك بعد يوم طويل من العمل الشاق..

تاكل و تقعد على سريرك حاسس انك مش قادر تتحرك من مكانك مهما كان السبب..

و حد من اهلك يناديك يقولك فلان بيكلمك على التليفون .. فجأة تجري على السماعة علشان تكلموا .. عارف ده معناه ايه؟

انك بتحب الشخص جدا لدرجة ان التواصل معاه بينسيك تعبك.. يا ترى لو كنت و انت على السرير افتكرت انك مصلتش العشاء كنت حتجري على السجادة ؟؟

حب لقاء الله في الدنيا علشان ربنا يحب لقائك في الاخرة :)

رمضان 9 - احب الأعمال

 

 مقياس حب ربنا لأعمالنا مش بكثرتها.. بل بدوامها.

لأن دوام العمل هو دليل على حبك لله و حرصك الدائم على التقرب له إن قل العمل.

{لاَ يُكَلِّفُ اللّهُ نَفْساً إِلاَّ وُسْعَهَا .. }البقرة286

ايه فايدة انك تختم القران 5 مرات في رمضان .. و اول ما يخلص الشهر تهجر القران !!

الزم نفسك في رمضان من الأعمال ما تطيق و داوم عليها و لا تيأس لو يوم قلت .. المهم ان مفيش يوم يعدي إلا و هو شيفك بتطيعه.

رمضان 8 - رضا الله

 

احلى حاجة ان ربنا يكون راضي عنا.. و الأحلى انك تعمل حاجة انت عارف أنها حترضيه.

كل ما تشرب او تاكل:

احمده .. انه انعم عليك بفضله و كرمه.
احمده .. انه رزقك بالطعام و الشراب.
احمده .. انه لم يبتليك بالفقر.

الحمد لله رب العالمين

رمضان 7 - كله خير

 

ساعات لما بنفرح بحاجة، بنحس ان الحاجة دي هي مصدر السعادة و لو فقدنها احساسنا بالسعادة بيتحول لغم و اكتئاب.

سمعت قبل كده جملة "لعله خير" .. الحديث ده بيقولك "كله خير".

كله خير يعني لو فرحت بحاجة اشكر ربنا لأنك من غير كرمه مكنتش حتفرح ..

كله خير يعني لو زعلت اصبر لانك عارف ان مشيئة ربنا هي اللي فيها كل الخير.. 

رمضان 6 - سجدة

 

في وقت الواحد بيكون مخنوق و حاسس انه بعيد اوي عن ربنا..

و الشيطان بيأكد المعنى ده جوانا و انك مهما عملت صعب اوي تكون زي واحد بيجتهد طول الوقت في العبادات.

عارف أن القرب و البعد كله بيتلخص في سجدة .. نزل راسك للأرض اللى خلقك منها و استشعر حلاوة انك قريب اوي من ربنا و ساعتها ادعي باخلاص باللى نفسك فيه :)

ما اكثر سجداتنا في رمضان .. بس انت كنت بتسجد بجد ؟!!

رمضان 5 - آلام المسلم

 

كل وجع حسيت به في الدنيا سواء كان بدني أو نفسي .. لم يذهب سُدى.

وقت الوجع ذنوبك كانت تمحى واحدة تلو الاخرى .. عارف يعني ايه؟

يعني كل اوجاعك هي في الأصل عطاء من ربنا .. بيطهرك علشان بيحبك و عالم ان ذنوبك كتير ممكن متوصلكش الجنة.

تعرف وقت ما تكون في قمة الحزن تشكره انه بيكفرلك ذنوبك و يكون قلبك راضي و صابر :)

رمضان 4 - اختار ربك

 

في ناس عايشة على أمل ان ربنا رحيم و بتعمل كل اللى نفسها فيه و ناسية ان فيه آخرة.

و في ناس عايشة و أملها في الدنيا ان ربنا يرضى عنها و بتعمل كل اللى تقدر عليه علشان تنجو من النار و تدخل الجنة.

في الدنيا انت اللى بتختار تكون أمن ولا خايف .. لكن في الآخرة ربنا اللى بيختارلك ..

كن مع الله :)

رمضان 3 - كنز الجنة

 

ما معنى لا حول و لا قوة الا بالله؟
لا حول للعبد في دفع شر، ولا قوة في تحصيل خير إلا بالله.

لا حول ولا قوة إلا بالله كلمة استسلام وتفويض إلى الله تعالى واعتراف بالخضوع له، وأنه لا صانع غيره ولا راد لأمره، وأن العبد لا يملك شيئا من الأمر.

كل ما تقول الكلمات دي قولها بقلبك مش بلسانك و تخيل رد ربنا عليك "أسلم عبدي و استسلم" و تخيل الثواب فتلك الكلمات كنز من كنوز الجنة.

رمضان 2 - السيئة و الحسنة

فاكر الذنب اللى كنت حتعملوا و ربنا شغلك عنه بحاجة تانية .. ابشر فلم يحسب ذنبا..

فاكر عمل الخير اللى كان نفسك تعملوا و ظروفك منعتك انك تعملوا .. ابشر ربنا كتبهالك حسنة..

فاكر الذنب اللى عملته و ندمت عليه .. مع الأسف اتكتب سيئة في صحيفة اعمالك لكن ابشر لو عملت عمل خير ربنا حيكتبهولك كأنك عملتوا عشر مرات.

عرفت ليه ربنا بيقولك  {وَأَقِمِ الصَّلاَةَ طَرَفَيِ النَّهَارِ وَزُلَفاً مِّنَ اللَّيْلِ إِنَّ "الْحَسَنَاتِ يُذْهِبْنَ السَّـيِّئَاتِ" ذَلِكَ ذِكْرَى لِلذَّاكِرِينَ }هود114 .. علشان بيحبك و عايز يبعدك عن النار و يدخلك جنته.

رمضان 1 - الحب في الله

ما معنى الحب في الله، وما معنى البغض في الله؟

الحب في الله أن تحب الشخص من أجل الله-تبارك وتعالى-؛ لأنك رأيته ذا تقوى وإيمان فتحبه في الله. وتبغض الشخص في الله لأنك رأيته كافراً عاصياً لله فتبغضه في الله.

فأهل الإيمان وأهل الاستقامة يحبهم حباً كاملاً, وأهل الكفر يبغضهم بغضاً كاملاً، وصاحب الشائبتين صاحب المعاصي يحبه على قدر ما عنده من الإيمان والإسلام, ويبغضه على قدر ما عنده من المعاصي والمخالفات.